MotoGP синфидаги пойгаларда иштирок этувчи Team LCR жамоасининг австралиялик мотопойгачиси Жек Миллер мусобақаларда уч ой синган қўллари билан иштирок этгани маълум бўлди. Бу ҳақда SuperSport маълум қилди.

12 июлдан 9 августгача давом этган ёзги таътилларда спортчи шифокор ҳузурига ташриф буюриб, пойгаларда маррага яқинлашганда кучини йўқотишига сабаб бўлган билагидаги оғриқлардан шикоят қилган. Олинган натижалар Миллерни ҳайратга солди. Маълум бўлишича, спортчининг иккала елка суяклари синган бўлиб, текширув ўтказилган пайтда улар битиб кетишга улгурган.

“Мен кучимни йўқотардим, қўлларим оғришни бошларди ва нима бўлаётганини тушунмасдим. Бу қандай юз берганини билмайман, бироқ ҳозирда ҳаммаси жойида”, деб айтди 20 ёшли пойгачи.

Рентген спортчининг билагидаги суяклардан бирида дарз борлигини аниқлади. Спортчи бу жароҳатни мотоциклдан йиқилгани оқибатида олган, бироқ у унга жиддий муаммолар туғдирмаган.

Маълумот учун, MotoGP пойгаси шоссе-ҳалқа йўллари бўйича ўтказиладиган энг нуфузли мотопойга ҳисобланади. Бу пойгада иштирок этадиган барча техника эркин савдода мавжуд эмас ва уларни умумий фойдаланиш йўлларида ишлатиш тақиқланган.