Япониянинг Россия расмийларининг жанубий Курил оролларига ташрифи ҳақидаги фикрлари асоссиз бўлиб, расмий Токионинг Иккинчи Жаҳон уруши якунларини шубҳа остига олаётганлигини кўрсатади. Бу ҳақда Россия ташқи ишлар вазирлиги баёнот тарқатди.
Япониянинг Курил оролларига даъвогарлик қилаётгани ҳақидаги гап-сўзлар бир муддат илгари матбуотда пайдо бўлганди. Япония расмийлари ҳамда журналистларининг Курилда Россия томонидан амалга оширилаётган ишларга катта диққат қаратилиши ТИВнинг эътирозларига сабаб бўлмоқда.
“Охирги пайтларда Япония томонидан РФ ҳукумати вакилларининг жанубий Курил оролларига сафари ҳақида асоссиз фикрлар айтила бошланди”, – дейилади ҳужжатда.
“Яна бир бора эслатиб ўтмоқчи эдикки, ҳукумат аъзоларининг иш графигини яратишда биз Токионинг нуқтаи назарини эътиборга олмаймиз; “2016-2025 йилларда Курил оролларини (Сахалин вилояти) ижтимоий-иқтисодий ривожлантириш” федерал мақсадли дастури доирасида амалга оширилаётган бундай сафарлар давом этади”, – қўшимча қилди ТИВ.
“Жанубий Курил оролларига бўлган асоссиз даъволарини оммавий тарзда баён қилаётган Япония Иккинчи Жаҳон урушининг якунларини биринчи марта шубҳа остига олиши эмас. Бундай хатти-ҳаракатлар айниқса бутун жаҳон ҳамжамияти учун муҳим сана – уруш тугашининг 70 йиллиги арафасида хавотирга сабаб бўлмоқда”, – хулоса қилинади ҳужжатда.