2001 йил 11 сентябрида содир этилган террорчилик актидан сўнг АҚШ тинимсиз равишда урушлар, аксилтеррор операциялари олиб бораётганига, турли ихтилофларга кираётганига, қийноққа солиш, дронлардан ҳужум уюштириш сингари кўплаб ишларни амалга ошириб келаётганига қарамай, мамлакат жамоатчилиг бунга ҳеч қандай муносабат билдирмаяпти. Вашингтоннинг ҳарбий кампаниялари ҳақидаги китоб муаллифи Том Энгельгардтнинг айтишича, америкаликлар уруш ҳақида эсламасликка ҳаракат қилмоқда, улар уруш ваҳшийликларига ўрганиб бўлди.

The Nation нашрида эълон қилинган мақоласида журналист 1960-70 йилларда мамлакатда авж олган урушга қарши ҳаракат босими остида сиёсатчилар ҳарбий ҳаракатларни профессионал армия ва хусусий компаниялар ихтиёрида қолдирганини эслатиб ўтди.

Вьетнам уруши йилларида америкаликлар ҳарбий ҳаракатларга жиддий қаршилик кўрсатишган эди. Энгельгардтнинг таъкидлашича, уруш америкаликлар томонидан “гўё қўшни кўчада бўлаётгандек” қабул қилинган эди. Вьетнам фахрийлари ОАВга ваҳшийликлар, ўлдирилган одамлар, маҳаллий аҳоли устидан напалм қуйилиш саҳналари қайд қилинган фотосуратларни етказар, ҳарбий жиноятлар бўйича судда ўзларига қарши гувоҳлик беришга тайёр эди. Аҳоли буни ҳар доим муҳокама қилар, минглаб одамлар ҳар куни кўчаларда митинглар уюштирар ҳамда президентлар Жонсон ва Никсон маъмуриятларига чинакам бошоғриғи яратар эди.

Бугун эса АҚШда урушга қарши ҳаракат, Энгельгардтнинг фикрича, мавжуд эмас. Ироқда юз минглаб, Афғонистонда ўн минглаб одамлар ҳалок бўлгани америкаликларни ташвишлантирмаяпти.
“Урушга қарши ҳаракатсиз уруш АҚШ учун охири йўқ урушга айланади”, – хулоса қилди колумнист.