The National Interest нашри Катон институти президенти ўринбосари Жин Хилининг АҚШнинг ИШИДга қарши олиб бораётган кураши ҳақидаги мақоласини эълон қилди.
“Ўтган шанба АҚШнинг ИШИДга қарши кампанияси бошланганига роппа-роса бир йил тўлди”, – эслатиб ўтади муаллиф.
Унинг ёзишича, шу пайтгача 5 минг авиазарба амалга оширилганига қарамай, Конгресс ҳалигача Яқин Шарқдаги ҳарбий ҳаракатларга рухсат бериш бўйича овоз бериш ўтказмади.
“Бир йил давомида ноқонуний ҳарбий кампаниянинг олиб борилиши конституцион тизимнинг емирилаётганидан далолатдир”, – таъкидлайди Хили.
“ИШИД позицияларига биринчи ҳаво зарбалари августда берилган эди, – давом этади сўзида эксперт, – аммо Обама Конгрессга ҳарбий кучдан фойдаланишга рухсат бериш лойиҳасини киритишига ярим йил керак бўлди”.
Шундан буён Конгресс амалда бу масалани муҳокама қилишдан бош тортди.
Ўз чиқишларидан бирида Обама президентлик даврида еттита мамлакатда ҳарбий операциялар ўтказиш ҳақида қарор қабул қилганини тан олган эди.
Хилининг фикрича, Обама ва Конгресснинг қилаётган ишлари АҚШнинг тинчлик сиёсати юритишига тўсқинлик қилмоқда.