Самарқанддаги “Ёшлик” маданият ва истироҳат боғининг ёзги театрида “Самарқанднинг юлдузли осмони остида” номли мусиқа ва шеърият кечаси ўтказилди. Тадбир ташкилотчилари Амир Темур номидаги маданият ва истироҳат маркази, Рус маданий маркази вилоят бўлинмаси ҳамда Самарқанд шаҳар маданият ва спорт ишлари бўлими бўлди, деб хабар берди 12news.
Дастурнинг фахрий меҳмони сифатида шаҳарга россиялик шоира Ирина Алексеева ташриф буюрди.
Тадбирни Рус маданий маркази вилоят бўлинмаси раиси Юрий Огнёв очиб берди.
Шундан сўнг сўз навбатини олган Алексеева шаҳарликларни яқинлашиб келаётган Мустақиллик куни билан табриклади. Унинг қалами остидан чиққан шеърлар турли тилларда ўқилди. Жумладан, “Самарқанд мадҳи” рус, ўзбек, тожик, озарбайжон, украин, инглиз ва эсперанто тилларида жаранглади. “Самарқанд нони ҳақида баллада” Баҳодир Ҳабибов таржимасида ўзбек тилида ўқилди.
Самарқандлик хонандалар Александр Калужин, Анастасия Степанова, Татьяна Букловская ва Матвей Усаковский ўз қўшиқлари билан тадбирда иштирок этишди.
Таъкидлаш жоизки, тадбир “Гўзаллик дунёни қутқаради” лойиҳаси доирасида БМТнинг маданиятлар жипслашуви ўн йиллиги (2013-2022) дастурига кўра ўтказилди.