Шанба куни Жанубий Корея пойтахти Сеул аҳолиси ҳавонинг меъёридан ортиқ ифлосланиши ҳақида огоҳлантирилди. Бу ҳақда Рёнхап агентлиги хабар бермоқда.
Айтилишича, ҳавода 2.5 микрондан кичик микрозарраларнинг ҳаводаги концентрацияси меъёридан ошиб кетиши фуқароларнинг соғлиғига хавф солиши мумкин. Шаҳарнинг айрим туманларида микрозарраларнинг ҳаводаги концентрацияси бир метр кубда 70 микрограммни ташкил этмоқда. 2.5 микрондан кичикроқ зарралар ҳавонинг туман билан қоплангани иллюзиясини яратади ва инсон ўпкасига чуқур ўрнашиб қолиб, бўғилиш ҳиссини келтириб чиқариши мумкин.
Шаҳар аҳолисига, биринчи навбатда ҳаво йўллари ва юрак касалликларига чалинганларга, шунингдек, болалар ва кексаларга кўчаларга имкон қадар чиқмаслик, чиққанда эса бурун ва оғизни ниқоб билан тўсиш тавсия қилинди.
Агентликнинг эслатиб ўтишича, шаҳарда бир йил ичида ҳаво ифлосланиши билан боғлиқ тўртинчи ҳолат кузатилмоқда.