Нью-Йорк полицияси И’Дена Хайнсни ўлдиришда гумон қилинаётган эркакни қўлга олди. The Daily Mail газетасининг маълум қилишича, гумондор қиз билан учрашиб юрган йигитдир.
30 ёшли Ламар Дэвенпорт рэпер ва ҳаваскор актёр сифатида маълум. У гиёҳванд моддалар истеъмол қилгани боис бир неча бор полиция диққатини ўзига тортган. Хусусан, у бир неча бор майда ўғриликда ва марихуана сақлаганликда айбланиб ҳибсга олинган. Тахмин қилинишича, жиноят содир этаётган пойтда Ламар кокаин таъсир остида бўлган.

Гумондор тиббий марказга олиб келинди. Бу ерда у психиатрия текширувидан ўтказилади, сўнг полиция томонидан сўроқ қилинади.
И’Дена Хайнс 16 август куни тунда ўлдириб кетилди. Гувоҳнинг маълум қилишича, йигит 33 ёшли қизга ташланиб, “Иблислар, йўқолинг! Исо Масиҳ номи билан сизларни қувиб чиқараман!” деб қичқирган ва қизни пичоқлаб ташлаган.

Пичоқдан 16та зарба еган қиз Гарлем шифохоналаридан бирига олиб келинди, аммо унинг ҳаётини сақлаб қолишнинг имкони бўлмади.

Хайнс хоним таниқли Ҳолливуд актёри Морган Фрименнинг ўгай набираси бўлади. У Фрименнинг биринчи рафиқаси – Жанетт Брэдшоунинг набирасидир. Фримен ва Брэдшоуларнинг никоҳи 1979 йили бекор қилинган.