ФИФАнинг собиқ вице-президенти ҳамда Корея футбол уюшмасининг собиқ раҳбари Чон Монжун ФИФАда инқироз юзага келганини таъкидлади ва бу вазиятни тўғрилаш мақсадида ФИФА президенти бўлмоқчилигини айтди. У бугун, 17 август куни ФИФА президентлиги учун номзодини қўйганини маълум қилган. Бу ҳақда Yonhap хабар берган.

Хабар қилинишича, 63 ёшли спорт амалдори Париж шаҳрида ўтказилган матбуот анжумани вақтида шу ҳақда эълон қилган.

"ФИФАнинг ҳозирги ҳолатида инқироздан қутқарувчи менежер хизмати талаб қилинади. Ташкилотга ислоҳотчи раҳбар керак. ФИФА сўнгги 10 йил давомида коррупция ичида қолди ва янги раҳбар ташкилотдаги шаффофликни қайтариши керак", дейди Чон Мончун.

Эслатиб ўтамиз, ФИФАга 1998 йилдан буйин раҳбарлик қилиб келган Йозеф Блаттер шу йилнинг 29 май куни ўтказилган сайловда бешинчи марта ташкилот раҳбарлигига сайланганди. Лекин шундан бир неча кун олдинроқ ФИФА тизимидаги бир қатор амалдорларга порахўрлик билан боғлиқ айбловлар қўйилгани ортидан 2 июнь куни у ўз лавозимини муддатидан олдин тарк этишини маълум қилганди.

Навбатдан ташқари сайлов 2016 йилнинг 26 февраль куни бўлиб ўтади.

Шу вақтгача франциялик собиқ футболчи Давид Жинола, Иордания шаҳзодаси Али ибн ал-Ҳусайн, бразилиялик мураббий Зико, аргентиналик собиқ футболчи Марадона, Либерия футбол уюшмасининг собиқ раҳбари Муса Билити ҳамда УЕФАнинг амалдаги раҳбари Мишель Платини ушбу сайловда қатнашишлари ҳақида расман маълум қилганди.