Эрон ва Россия ташқи ишлар вазирлари – Сергей Лавров ва Жавод Зариф Москвада музокаралар ўтказади. Бир ойча муқаддам улар Венада учрашиб, Эрон ядровий дастури бўйича имзоланган келишув музокараларида иштирок этишган эди. Ушбу мавзу Москвадаги учрашувда яна бир бор кўтарилиши кутилмоқда.
Шунингдек, дипломатик идоралар раҳбарлари икки томонлама алоқаларни янада ривожлантириш истиқболларини муҳокама қилиши айтилмоқда. Халқаро сиёсатнинг долзарб муаммолари қаторида Суриядаги вазият муҳокама қилинади.
Россия ТИВининг эътироф этишича, ядровий дастур бўйича келишувга эришилгани Эроннинг минтақадаги мавқеини янада оширди. Эндиликда Эрон Сурия инқирози оқибатларини бартараф этишга жиддий киришган ва ҳатто тинчлик режаси устида ишламоқда.