17 август куни Бангкок марказида портлаш содир этганликда гумон қилинаётган шахснинг кимлиги аниқланди, дея хабар берди Таиланд бош вазири Прают Чан-Оча.

Франс-Пресс агентлиги маълумотига кўра, портлашдан ҳалок бўлганлар сони 27 нафарга етиб, 123 киши жароҳат олган.

Айни пайтда ҳукумат ҳодиса жойи яқинидаги видео кузатув камераси тасвирга олган гумондор билан боғлиқ суриштирув ишларини бошлаб юборган. “Бугун камера ёзувларига тушган гумондор шахси маълум, лекин бу аниқ эмас ҳали. Биз ушбу йигитни қидираяпмиз”, деди бош вазир. Унинг қўшимча қилишича, гумондор шахс “Таиланд шимоли-шарқида тузилган ҳукуматга қарши гуруҳ”нинг аъзоси бўлиши эҳтимоли баланд.

Эслатиб ўтамиз, портлаш 17 август куни Бангкокнинг савдо-сотиқ ва сайёҳлик марказидаги Ратчапрасонг чорраҳасида маҳаллий вақт билан 18:56да содир бўлган эди. Қўлбола радиобошқарувли портловчи модда Хитой, Сингапур ва тайванлик сайёҳлар гавжум бўлган тўрт бошли фил кўринишидаги Эраван илоҳи яқинида ҳаракатга келтирилган эди.