“Ансор Аллоҳ” ҳаракати тарафдорлари – ҳусийчилар Бирлашган Араб Амирликларининг Ямандаги элчихонасини босиб олди. Бу ҳақда БАА Ташқи ишлар вазирлиги маълум қилди, деб хабар бермоқда РИА “Новости” ахборот агентлиги.

“БААнинг Яман пойтахти Санодаги элчихонасининг ҳусийчилар гуруҳи томонидан босиб олинишини қатъиян қоралаймиз”, деб айтилмоқда вазирликнинг баёнотида.

Вазирликнинг маълумотларига кўра, воқеа 16 август куни кечки пайт юз берган.

Элчихонанинг барча ходимлари кўчага ҳайдаб чиқарилган ва ичкарига киритилмаяпти.

БАА жангариларнинг бинони бўшатишларини талаб қилмоқда ва ўзларида “босқинчиларни жавобгарликка тортиш” ҳуқуқини сақлаб қолишларини маълум қилди.

“Бу ҳаракатлар уни амалга оширган гуруҳ халқаро келишувлар ва дипломатик меъёрларга ҳеч қанча аҳамият бермаслиги ва “жунгли қонунлари” бўйича яшашининг яна бир карра исботи бўлди”, деб таъкидланмоқда вазирликда.

БАА ҳукумати ҳусийчиларнинг бундай ҳаракатлари 1961 йилдаги дипломатик алоқалар ҳақидаги Вена конвенцияси ва 2014 йилда қабул қилинган БМТ Бош ассамблеясининг 69/121 резолюциясинининг бузилиши деб ҳисобламоқда.