Бухоро суди маст ҳолда акасини ўлдириб қўйган фуқаро Азиз Маҳмудовни 18 йиллик қамоқ жазосига ҳукм қилди. Воқеа тафсилотлари “Постда” газетасида баён қилинди.
Азиз Маҳмудов бир неча йил ногирон акаси Аъзамнинг уйида яшаб келган. Тирикчилик мақсадида жияни Азамат билан картон қутилар ва макулатура тўплаш билан шуғулланган.
Бир куни улар ишдан қайтиш чоғида йўлдан ароқ сотиб олишган ва уйга олиб келишган. Ароқ ича бошлаганларида уларга акаси Аъзам ҳам қўшилган.

Орадан бирмунча вақт ўтгач, маст бўлиб қолган Аъзам Маҳмудов рафиқасидан пул талаб қилиб унга ташланган. Янгасини акасини чангалидан қутқаришга ҳаракат қилган Азиз уларнинг ёнига етиб борган, аммо ака ва ука ўртасидаги жанжал авж олган. Аъзам қўлида пичоқ билан укасига ҳужум қилган. Ҳимояланиш чоғида ўзи ҳам маст бўлган Азиз пичоқни тортиб олиб, акасининг кўкрагига санчган.

Акасининг жони узилганини кўриб, кайфи тарқаган Азиз Маҳмудов уйдагиларни Аъзамнинг ўз жонига қасд қилганига ишонтирмоқчи бўлган. Аммо ҳуқуқ-тартибот ходимлари томонидан ўтказилган суриштирув ишлари воқеанинг асл ўзагини тиклаш имконини берди.