2015 йилнинг январь-июль ойлари якунларига кўра, Хитой пойтахтида янги энергия манбаларида ишловчи автомобиллар ишлаб чиқариш ҳажми 2014 йилнинг январь-июль ойларига нисбатан 3,2 баробар ортиб, 11 минг донага етди, дея хабар берди Пекин статистика бошқармаси.

Жорий йилнинг олти ойи ичида Пекиндаги экомобиллар ишлаб чиқарувчилар умумий даромади 55,6 фоизга ортган.

Аввалроқ 2015 йил июль ойи якунига кўра, Хитой автомобилсозлари томонидан янги энергия манбаларида ҳаракатланувчи 20400 дона автомобиль ишлаб чиқарилгани хабар қилинган эди. Бу 2014 йилнинг июль ойидагидан кўра 3,5 марта кўп демакдир. Бунда фақатгина тижорий мақсадларда ишлаб чиқарилган экомобиллар ҳажми 677 фоизга ортиб, йиллик кўлами 8045тага етган.

2015 йилнинг январь-июль ойларида эса мамлакат конвейерларидан янги энергия манбаларида ишловчи 98900 дона экомобил чиққан. Бу аввалги йилларга қараганда 300 фоиз кўп демакдир.