“Ислом давлати” эктремистик гуруҳи (ИШИД) жангарилари кеча, 18 август куни Суриянинг Пальмира шаҳридаги қадимий мажмуа бош нозирини қатл қилишди, дея хабар тарқатди Reuters.

Ўлдирилган Халед Асаад қариндошларининг айтишича, Пальмирада 50 йилдан зиёд ишлаган 84 ёшли археологнинг жасадини жангарилар қадимий шаҳарнинг марказий хиёбонига олиб келишган. Вафотига қадар археолог сўровлар вақтида қийноққа солинган.

Асаад узоқ йиллар мобайнида европалик ҳамкасблари билан Пальмира шаҳрида археологик қазувларни олиб борган, кўплаб асарлар муаллифи ҳисобланади.

2015 йил май ойида Пальмира "ИШИД" жангарилари қўлига ўтишидан аввал Сурия ҳукумати юзлаб қадимий ҳайкаллар хавфсиз ҳудудга олиб кетилганини маълум қилган эди.