Samsung компанияси янги Galaxy O смартфонлар сериясини чиқаришга тайёрламоқда. Бу ҳақда SamMobile ресурси маълум қилди.

Янги сериядан дастлаб иккита модель – SM-G550 ва SM-G600 смартфонлари ўрин олади. Бозорда улар Galaxy O5 ва Galaxy O7 номлари остида пайдо бўлиши кутилмоқда. Янги қурилмаларнинг техник кўрсаткичлари ҳақида маълумотлар ҳали унча кўп эмас. Galaxy O5 смартфони 5 дюймли сенсор экран, Galaxy O7 эса 5,5 дюймли сенсор экран билан жиҳозланиши тахмин қилинмоқда.

Янги смартфонларда дастурий платформа сифатида дастлаб Android 5.1 (Lollipop) операцион тизими компаниянинг TouchWiz фойдаланувчи интерфейси ва қўшимча дастурлар тўплами билан қўлланади.

Смартфонлар Берлинда 4-9 сентябрь кунлари бўлиб ўтадиган IFA 2015 кўргазмасида намойиш қилиниши мумкин. Янги қурилмаларнинг сотувга чиқарилиши ва нархи ҳақида ҳозирча ҳеч қандай маълумот берилмаган.