Тошкентнинг Яккасарой туманидаги ресторанлардан бирида ёшлар ўртасида содир бўлган муштлашувда рестораннинг тартиб сақловчи икки нафар ходими пичоқланди. Бу ҳақда “Постда” нашри ёзмоқда.

Айтилишича, Фарҳод исмли йигит туғилган кунини нишонлаш мақсадида дўстлари Акмал, Азиз ва Бунёдни ресторанга таклиф қилган. Зиёфат авжига чиқиб, йигитлар маст бўлиб қолган пайтда рақс майдончасида улар туғилган кунини нишонлаётган бошқа бир гуруҳ ёшлар билан гап талашиб қолган. Натижада муштлашув юзага келган.

Майдончага ресторан қўриқчилари етиб келиб, йигитларни кўчага чиқариб ташлашган. Шунда улар қўриқчиларга ташланишган. Акмал исмли йигит пичоқ билан қўриқчилардан бирининг биқинига, бошқасининг кўкрагига зарба берган.

Қўнғироқ бўйича етиб келган ички ишлар идораси ходимлари тўполонни тўхтатиб, барча иштирокчиларни идорага олиб кетишди. Акмал ва Бунёдларнинг иши эса судга топширилди.