Қозоғистондаги Семей шаҳри ҳокими Ермак Салимов жамоат транспорти ишини кузатиш мақсадида бекатга чиқди, аммо бу ерда керакли автобуснинг келишини бир соат кутишига тўғри келди. Бу ҳақда “ВКонтакте” ижтимоий тармоғидаги семейликлар гуруҳида хабар қилинди.

“Бугун пешинда шаҳар ҳокими маслаҳат котиби билан биргаликда йўловчи ташиш графигига амал қилинишини текширди. Аниқланишича, 45-рақамли йўналишли автобусни бир соат кутишга тўғри келди. Наҳотки ҳокимият бу муаммони ҳал қилишга киришган бўлса? Аслида барча автобусларни текшириш керак.

Гап нарх оширишга келганда буни бажонудил муҳокама қилишади. Хизмат сифатини кўтаришга келганда эса ҳамма жим бўлади. Мен хизмат сифати ҳақидаги фикримни ҳокимга шахсан айтдим. Унинг ишлаш услуби бошқаларникидан фарқ қилади”, – деб маълумот берди гуруҳ фойдаланувчиларидан бири.