Ўзбекистон Миллий хавфсизлик хизмати ходимлари республика ҳудуди орқали Тожикистондан Қозоғистонга олиб ўтилаётган гиёҳванд моддалар контрабандасини тўхтатиб қолишди.

Республика МХХ матбуот хизматининг хабар қилишича, Самарқанд вилоятидаги постлардан бирида Тошкентга йўл олган электр ускуналар ортилган автомобиль кўздан кечирилди.

Автомобилни текшириш жараёнида кузовдаги юклар остида вазни 20 кг бўлган 20 ўрам героин жойлаштирилган спорт сумкаси аниқланган.

Қўлга олинган юк автомобили ҳайдовчисининг кўрсатмалари асосида олиб борилган тезкор оператив қидирув чоралари натижасида Самарқанд вилоятининг Ургут тумани ҳудудидаги Тожикистон чегарасига яқин уйларнинг бирида молхонага яшириб қўйилган гиёҳванд моддаларнинг яна бир катта партияси аниқланди. Целлофан ўрамларда 30 килограмм героин топилди.

Қўлга олинган шахснинг сўзларига кўра, гиёҳванд моддалар Душанбе шаҳрида яшовчи тожикистонлик нарковоситачилардан олинган бўлиб, Тошкент шаҳрига икки бўлган ҳолда етказишни режалаштирган. Вазни 50 кг бўлган барча гиёҳванд моддалар қишлоқ хўжалиги маҳсулотлари билан бирга Қозоғистоннинг Караганда шаҳрига йўналтирилиши лозим бўлган.

Мазкур маълумотлар юзасидан жиноий иш қўзғатилган бўлиб, трансчегаравий наркотўданинг бошқа аъзоларини қўлга олиш юзасидан тергов-қидирув ишлари олиб борилмоқда.