Россия суди мудофаа вазирлигининг 800 млн рубль маблағни ўзлаштиришда айбланаётган ходимаси Евгения Васильевани шартли равишда озодликка чиқарди. РИА Новости агентлигининг маълум қилишича, у колониядан бугун чиқарилади.

“Суд Васильева адвокатларининг шартли равишда муддатдан илгари озод қилиш ҳақидаги илтимосини қондиришга қарор қилди”, - дейилади суднинг якуний хулосасида.
2015 йил майида “Оборонсервис”да улкан миқдордаги пулларни ўзлаштириб, давлат манфаатларига 800 млн рубль миқдорида зиён етказишда айбланган Евгения Васильева суд томонидан 5 йиллик қамоқ жазосига ҳукм қилинган эди.

Шунингдек, у зарар кўрган ташкилотларга 77 млн рубль тўлаб бериши кўрсатилган эди.
Шартли равишда озод бўлиш имконияти Васильевада жуда тез пайдо бўлди: суд бунинг учун аёл уй қамоғида ўтказган вақти етарли деб топди. Шундан сўнг у фақат жабрланувчиларнинг ва прокуратуранинг розилигини олиши, шунингдек, колониядан ижобий тавсифнома олиши керак эди.

Васильеванинг озодликка чиқишини тезлаштириш учун унинг отаси барча даъволар бўйича белгиланган 217 млн рубль миқдоридаги қарздорликни август бошига қадар тўлади.