Киевнинг "Динамо" жамоаси яримҳимоячиси Андрей Ярмоленко "Барселона" жамоасининг қизиқишлари доирасига тушди.

Sport.es нашрида ёзилишича, каталонияликлар "Челси"га ўтиб кетган Педронинг ўрнини тўлдириш устида ишлашмоқда. Унинг муносиб ўринбосари сифатида Ярмоленкодан ташқари "Сельта" аъзоси Нолитонинг номзоди ҳам кўриб чиқилмоқда.

Айни вақтда жамоа футболчилар учун таклиф юбормаган, лекин жамоа ҳужумчиларидан бири жароҳат олса, улар бу ишга фаол тарзда киришишлари айтилган.

Нашрнинг ёзишича, "Барселона" бу икки футболчининг ўйинларини қишки трансферлар давригача кузатишда давом этади. Унгача эса Луис Энрике жамоадаги ёш футболчилар Сандро ва Мунирни ўйнатиб туриши мумкин.

Бироз олдинроқ, "Динамо" "Эвертон" билан Ярмоленко масаласида музокара олиб бораётгани хабар қилинганди.

Эслатиб ўтамиз,"Барселона" ёзги трансферлар вақтида "Атлетико"дан Арда Туранни ҳамда "Севилья"дан Алеиш Видални сотиб олган. Лекин бу футболчилар УЕФАнинг каталонияликларга қўллаган жазо туфайли 2016 йилнинг январигача майдонга туша олишмайди.