Интернетде Боливия президенти тансоқчиси президентнинг туфлиси боғичини бойлаб қўяётгани акс этган видео пайдо бўлди

Жаҳон 26 Август 2015 4228

Боливия президенти Эво Моралес ижтимоий тенгҳуқуқликни бузганликда айбланмоқда. Бунга Моралеснинг тансоқчиси унинг туфлисидаги боғични боғлаб қўяётгани тасвирланган видеонинг интернетда пайдо бўлиши сабаб бўлган. Видеода президентнинг ўзи бу вақтда суҳбатдоши билан суҳбатлашишда давом этаётганини кўриш мумкин, деб ёзмоқда The Daily Mirror нашри.

“Давлат хизматчиси, аскар ёки полициячини бундай камситиш ақлга сиғмайди”, деб изоҳ берди бу ҳолатга мамлакат мухолифати вакили Гэри Прадо.

Моралеснинг танқид қилинишига парламент депутати Артуро Мурилло ҳам қўшилди. “Президент ўзини худо деб билиб, нима хушига келса, шуни қилади”, деб президентнинг бу қилмишини қораламоқда Мурилло.

Ушбу видео Моралеснинг Боливиянинг марказида жойлашган Кочабамба шаҳридаги спорт марказига ташрифи пайтида олинган. Моралеснинг тарафдорлари бу видео президентнинг шаънига доғ тушириш мақсадида атайлаб монтаж қилинган бўлиши мумкин, деб таъкидламоқдалар. Ҳукуматдаги манбанинг айтишича, давлат раҳбарига хавфсизлик нуқтаи назаридан энгашиш тақиқланган.

Эво Моралес ўтган йили учинчи бор мамлакат раҳбари этиб қайта сайланди. У сайловларда 60 фоиз овоз тўплаган. Сиёсатчи ўз интервьюларида бир неча бор жуда камтар яшашини айтган. Моралес хорижий етакчилар билан учрашувларда қамсуқум костюмлар ва тўқилган свитерларда пайдо бўлиши билан ажралиб туради. Бироқ унинг рақиблари уни авторитарликда айблаб, унинг хатти-ҳаракатлари ўзи тарғиб қиладиган қадриятларга зид келишини таъкидлайдилар.

Кўпроқ янгиликлар