Америка полицияси бировнинг уйига ўғриликка тушиб, ўмарган буюмларини ўша ернинг ўзида интернет орқали сотувга қўйган жиноятчини қидирмоқда.

FoxNews телеканалининг хабар беришича, Вашингтон штатида Саурслар оиласига тегишли хонадонга номаълум шахс яширинча кириб, у ерда бир муддат яшаш билан бирга, уйдаги буюмларини сотувга қўйган.

Чета Саурс 25 йил давомида шу уйда яшаган ва бир оз муқаддам янги уйга кўчиб ўтган. Эр-хотин сотишни мўлжаллаб, эски уйида кўплаб мебел ва техникаларни қолдирган бўлган.

Уй эгаси кўчмас мулк савдоси агенти билан ўз хонадонига келганида, унинг олдидаги юк машинасига кўзи тушади. Ошхонада эса номаълум эркакни учратишади. Бу ерда нима қилаяпсиз, деган саволга микротўлқинли печни интернет орқали сотиб олганини маълум қилади. Худди шу вақтда уйдан номаълум шахс қочиб чиқиб кетади.

Кейинроқ маълум бўлишича, ўзганинг уйида бир неча кун давомида яшаган жиноятчи кир ювиш машинаси, музлаткич, газ плитаси, телевизор, матрац ва бошқа ускуналарни сотиб юборишга улгурган экан. Уй эгаси моддий йўқотишларини 5 минг долларга баҳолади.