Нью-Йорк шаҳрида жойлашган АҚШ ва Канада Бухоро яҳудийлари Конгресси марказида “Тошкент - телевидения ватани” ва “Агар сен ҳақ бўлсанг” ҳужжатли фильмлари ҳамда Ўзбекистонда чоп этиладиган “Ўзбекистон санъати” журналининг тақдимотлари бўлиб ўтди.

“Жаҳон” АА хабар беришича, тадбирда АҚШ телекомпания, ОАВ ва босма нашрлари, шунингдек, жамоат ташкилотлари вакиллари иштирок этдилар. Тақдимот чоғида ижтимоий йўналтирилган бозор иқтисодиётига эга бўлган ҳуқуқий демократик давлат барпо қилишда мамлакатимиз қўлга киритган мувафаққиятлар, миллий телевидениямиз ютуқлари, шунингдек, миллий санъат ва маданиятни ривожлантириш ва қўллаб-қувватлашга қаратилган дастурларни амалга ошириш ҳақидаги батафсил малумот иштирокчилар эътиборига ҳавола қилинди. Тадбирда сўзга чиққанлар мамлакатимиз тарихан қисқа давр ичида салмоқли ютуқларга эришганини таъкидлаб ўтишди.

Шунингдек, Ўзбекистоннинг бой тарихий мероси ва замонавий сайёҳлик саноати ҳақида маълумот берувчи турли ахборот материаллари ва брошюралар тақдимот иштирокчилари ва меҳмонлар орасида тарқатилган.