Тошкент ва Теҳрон Эрон нефтини Ўзбекистонга экспорт қилиш имкониятларини муҳокама қилди. Эроннинг Тошкентдаги элчихонаси матбуот хизмати маълумотларига кўра, бу ҳақда Эроннинг Ўзбекистондаги элчиси Али Мардоний Фард ва Ўзбекистон Ташқи иқтисодий алоқалар, инвестициялар ва савдо вазири Элёр Ғаниев ўртасида кечган суҳбат чоғида сўз борган.

“Янги транспорт коммуникацияларидан фойдаланган ҳолда Эрон нефтининг етказилиши ҳисобига ўзбек-эрон маҳсулот айирбошлаш ҳажми 250 миллиондан 1 миллиард долларгача ортиши мумкин”, – дейилади элчихона матбуот хизмати хабарида.

Илк маротаба 2014 йилнинг август ойида Эроннинг Ўзбекистондаги элчиси Али Мардоний Фард Теҳрон Ўзбекистонга нефть етказиб беришни бошламоқчи эканини маълум қилган эди. “Эрон Ўзбекистонга Ўзбекистон-Туркманистон-Эрон-Уммон транспорт коридори орқали йилига бир миллион тоннагача нефть етказиб беришни таклиф қилмоқда”, – деган эди Тошкентдаги дипломатик ваколатхона раҳбари.

Қайд этиш жоизки, Ўзбекистоннинг нефтга бўлган талаби йилига 4,2 млн тоннани ташкил этади. Ўзбекистонда нефть қазиб олиш ҳажми эса сўнгги йилларда 3,2 млн тоннадан иборат. Эҳтиёжларни қондириш мақсадида айни пайтда Ўзбекистон Қозоғистон ва Россиядан нефть импорт қилмоқда.