Каспий денгизидаги ҳарбий кемалардан Россия қанотли ракеталарининг ИШИД объектлари томонга учирилиши тасвирланган видео қарийб 2,8 миллион мартаба томоша қилинди. Ролик 7 октябрь куни Россия Мудофаа вазирлигининг YouTube видеохостингидаги расмий каналида эълон қилинган эди.

Роликда Каспий денгизида жойлашган Россия денгиз флотининг бир қатор кемаларидан ракеталар учирилиши жараёни намойиш этилган эди. Шунингдек, компьютер графикаси ёрдамида снарядларнинг учиш траекторияси ҳам визуаллаштирилганди.
Видеоёзувга қолдирилган изоҳда юқори аниқликдаги “Калибр НК” комплексидан ўт очилгани айтилган. Ракеталар муваффақиятли ва “юқори аниқликда” белгиланган барча нишонларни йўқ қилгани ҳам хабар қилинган.

Эслатиб ўтамиз, 7 октябрь куни Россия Мудофаа вазири Сергей Шойгу Каспий денгизи ҳавзасида жойлашган 4та Россия ҳарбий кемасидан Суриядаги ИШИД нишонларига қарата 26та ракета учирилганини маълум қилган эди.