2014 йилда Ўзбекистонда 6 млн 500 минг нафар мактабгача таълим муассасалари тарбияланувчилари, мактаб, касб-ҳунар коллежлари ва академик лицей ўқувчилари чуқурлаштирилган тиббий текширувдан ўтказилди.

Бу ҳақда Ўзбекистон Республикаси Олий Мажлиси Сенати Фан, таълим, маданият ва спорт масалалари қўмитаси раис ўринбосари Гавҳар Алимова 30 октябрь куни “Ёшларга оид давлат сиёсатини амалга оширишда ОАВнинг роли” мавзусида ўтказилган семинар-тренингда маълум қилди. Унинг сўзларига кўра, ўтказилган тиббий текширувлар натижасида Ўзбекистонда болаларнинг 64,5 фоизи мутлақ соғлом деб топилди.

Шунингдек, оналик ва болаликни муҳофаза қилиш, соғлом ва баркамол авлодни вояга етказиш борасида амалга оширилаётган ишлар самараси ўлароқ, мустақиллик йилларида юртимизда оналар ўлими 3,1 баробар, гўдаклар ўлими 3,2 баробарга камайди.