Шу кунларда ўтаётган IX Халқаро саноат ярмаркаси ва кооперацион биржаси доирасида Самарқанд автомобиль заводи сиқилган табиий газда ишловчи (CNG) двигателга эга автобус намойиш қилди.

CNG двигателли автомобилларнинг экологик ва иқтисодий томондан фойдали эканлигини ҳисобга олган ҳолда, бундай маҳсулотга талаб юқори бўлиши прогноз қилинмоқда. Ушбу тенденцияни ҳисобга олиб, Самарқанд автомобиль заводида ISUZU Motors кўмагида CNG двигателли йўловчи автобуси ишлаб чиқиш зарурлиги ҳақида қарор қабул қилинди. Евро-4 юқори экологик стандартига мувофиқ келган ҳолда, бундай турдаги автобуслар Ўзбекистонда ишлаб чиқарилган йўловчи транспортининг янги сифат даражасига чиқишига имкон беради.

Ўзбекистон ҳукумати қарорига кўра, CNG двигателли  тижорат автомобилларининг ишлаб чиқарилиши ISUZU ва Самарқанд автомобиль заводининг қўшма лойиҳаси доирасида 2011 йилда бошланган эди. 2013 йилда газ двигателли юк автомобиллар ишлаб чиқарилиши бошланди, 2014 йилда эса завод томонидан CNG двигателли  махсус чиқинди ташувчи автомобиллар ишлаб чиқарилиши ва етказиб берилишига буюртма олинди.

Шу билан бирга “СамАвто” паст полли LE60 автобусларини ишлаб чиқаришни давом эттирмоқда. Завод Ўзбекистон шаҳарларининг автопаркларига биринчи бундай автобусларни етказиб бера бошлади. Кейинги йилда бу автобусларнинг ишлаб чиқарилиши ҳажми оширилади. Samauto LE60 автобусининг лойиҳалаштирилишида Россиянинг “Эрмис” инжиниринг компанияси иштирок этган. Автобус Cummins (185 от кучига эга) ёки ISUZU (190 от кучига эга) двигателлари, механик ёки автоматик узатмалар қутиси билан жиҳозланиши кўзда тутилган.

Айни пайтда заводда 56 кишигача сиғимга эга, 100 дан 190 от кучигача эга двигателли 4 хил моделдаги автобус ҳамда юк кўтариши 1,5 тоннадан 8 тоннагача бўлган 7 та моделдаги юк ва махсус автомобиллар (NKR, NQR, NPS, NPR82L-CNG, FVR33P, FVR33G, FTR33H) ишлаб чиқарилади. Ҳаммаси бўлиб шу кунгача заводда Isuzu Motors агрегатлари негизида 22 мингдан кўпроқ автобус ва юк машинаси ишлаб чиқарилган.