2015 йилнинг 18-25 октябрь кунлари давлат ва нодавлат ташкилотлар вакилларидан иборат Ўзбекистон делегациясининг Корея Республикаси (Сеул шаҳри) ҳамда ХХР (Пекин, Шанхай шаҳарлари)га ташрифи ташкил этилди. Бу ҳақда Фуқаролик жамияти шаклланишини мониторинг қилиш мустақил институти ахборот хизмати хабар қилди.

Делегация вакиллари фуқаролик жамияти ривожида ўз-ўзини бошқари органларининг аҳамиятига бағишланган “Маҳалла институти ва фуқаролик жамиятини ривожлантиришда Ўзбекистон тажрибасини ўрганиш” мавзусида давра суҳбатлари ва учрашувлар ўтказилди.

Ташриф доирасида Сеул ва Шанхай шаҳарларида “Фуқароларнинг ўзини ўзи бошқариш органлари: замонавий ўзбек жамиятини мустаҳкамлашнинг муҳим механизми” мавзусида давра суҳбатлари ташкил этилди.

Ўтказилган давра суҳбатларида Ўзбекистондаги маҳалла институтининг қадимий ва ноёб бошқарув шакли эканлиги, жамиятда тинчлик ва осойишталикни, оилалар мустаҳкамлигини таъминлаш ҳамда ёшларни ватанпарварлик руҳида тарбиялаш борасидаги ўрни ҳақида давра суҳбати иштирокчиларига атрофлича маълумотлар берилди.

Шунингдек, Ўзбекистон делегацияси томонидан тайёрланган “Ўзбекистонда ёшлар ва таълим” ва “Ўзбекистонда ёшлар ва спорт” мавзуларидаги видеолавҳалар давра суҳбати иштирокчиларида катта қизиқиш уйғотди ҳамда уларнинг Ўзбекистонда спорт ва таълим соҳасини ривожлантириш борасида олиб борилаётган амалий ишлар ҳақидаги тасаввурларини бойитишга хизмат қилди.