Бухорода Бухоро вилояти кўптармоқли тиббиёт марказида ўзбекистонлик ва жанубий кореялик шифокорлар бемор болаларни тиббий кўрикдан ўтказдилар.

Ўзбекистон Республикаси Соғлиқни сақлаш вазирлиги ҳамда Жанубий Кореянинг “Hyundai Engineering” компанияси ҳамкорлигида ташкил этилган тиббий кўрикдан кўзланган мақсад болалар саломатлигини мустаҳкамлаш, кам таъминланган оилалардаги бемор болаларни ижтимоий ва тиббий жиҳатдан қўллаб-қувватлашдан иборат.

Тибибёт марказига келган хорижлик терапевт, педиатр, акушер-гинеколог, нейрохирург ва окулистлар уч кун давомида болалар ва кексаларни чуқурлаштирилган тиббий кўрикдан ўтказдилар. Мурожаат қилганларнинг бир қисмига аниқ ташхислар асосида даволаниш бўйича тавсия билан бирга дори-дармон ҳам берилди.

“Тўрт ёшли ўғлимни шифокорлар синчиклаб текширди, – дейди Нозима Бобоева. – Жиддий касаллик йўқлигидан жуда хурсандман. Шунчаки, шифохонада даволаниши керак экан. Бундай эътибор ва ғамхўрлик учун Президентимиздан миннатдормиз”

Тиббий кўрикда вилоят кўптармоқли тиббиёт марказининг тегишли йўналишлардаги шифокорлари ҳам иштирок этди. Бу улар учун тажриба алмашиш, маҳоратларини ошириш учун яхши имконият бўлди.

“Дунёнинг кўплаб давлатларида бўлган шифокор сифатида айтишим керакки, Ўзбекистонда тиббиёт соҳасида, унинг моддий-техник базасини мустаҳкамлаш борасида ибратли ишлар амалга оширилаётганига гувоҳ бўлдим. Бухоро вилояти кўптармоқли тиббиёт марказида барча қулайликлар яратилган бўлиб, замонавий тиббий жиҳозлар билан таъминланган. Бу ерда барча шароитлар мавжудлиги боис биз келтирган тиббий ускуналарга ҳожат ҳам қолмади”, деди жанубий кореялик шифокор Канг Пёнг Сок.