Охирги 10 йил ичида Ўзбекистонда эркакларнинг ва аёлларнинг ўртача умр кўриши мувофиқ равишда 73 ва 75 ёшга етди. Бундан ташқари, мамлакатда аёлларнинг роли ошиб бораётгани уларнинг парламентдаги фаол иштирокида кўринади.

Бу маълумотлар Ўзбекистоннинг аёллар дискриминациясини йўқ қилиш бўйича БМТ қўмитасидаги делегацияси ўқиб эшиттирган ҳисоботда келтирилди. БМТ ахборот марказининг хабар қилишича, Ўзбекистон Женевада тегишли конвенция бўйича амалга оширилаётган ишлар юзасидан ҳисобот топширди.

Ўзбекистон инсон ҳуқуқлари бўйича миллий маркази директори Акмал Саидовнинг сўзларига қараганда, инсон ҳуқуқлари ва манфаатларини ҳимоя қилиш йўлида халқаро ҳуқуқ меъёрларига халқ менталитети ва қадриятларини инобатга олган ҳолда амал қилинмоқда.

Қўмита экспертлари инсон савдоси ва мажбурий меҳнатга қарши кўрилаётган чоралар билан қизиқиб кўришди. Ўзбекистон делегацияси уларни бу борада амалга оширилаётган ишлар билан таништирди.