11 ноябрь куни Парламент қуйи палатаси аъзолари “Электрон ҳукумат тўғрисида”ги Ўзбекистон Республикаси қонуни лойиҳасини биринчи ўқишда кўриб чиқишди.
Олий Мажлис Қонунчилик палатаси Ахборот хизматининг хабар қилишича, унинг қабул қилиниши “электрон ҳукумат” тизимини жорий этишнинг асосий йўналишларини аниқ белгилашга,

ахборот технологияларидан давлат органлари фаолиятида фуқаролар, ташкилотлар билан ўзаро ҳамкорликда фойдаланишни кенгайтиришга, давлат бошқаруви органлари фаолиятининг самарадорлиги, шаффофлиги ва очиқлиги даражасини оширишга кўмаклашади.
“Қонуннинг қабул қилиниши аҳоли ва тадбиркорлик субъектлари орасида энг зарур электрон давлат хизматларини татбиқ этиш ва амалга оширишга, давлат хизматларини сифатли кўрсатиш ва давлат органларининг бирхиллаштирилган идоралараро электрон ўзаро ҳамкорликка тўлақонли ўтиш учун ахборот тизимлари комплекслари ва электрон ҳукумат маълумотлар базалари уйғунлашувига шароит яратади,

– деди Ахборот ва коммуникация технологиялари масалалари қўмитаси аъзоси Эркин Халбутаев. – Қонун замонавий ахборот-коммуникация технологиялари салоҳиятидан фойдаланиш ҳисобига давлат органлари ва фуқаролар ўртасида очиқ, конструктив муҳит яратишга, улар ўртасида самарали шериклик муносабатларини йўлга қўйишга қаратилгандир”.

“Қонун лойиҳаси тайёрлашнинг босқичида экспертлар доирасида кенг муҳокама қилинди, миллий ва хорижий мутахассислар иштирокида бир қатор тадбирлар ўтказилди, – дейди Ахборот ва коммуникация технологиялари масалалари қўмитаси аъзоси Шухрат Шарафутдинов. – Унда халқаро қонунчиликнинг концептуал жиҳатлари ва электрон ҳукумат тизимларини ривожлантиришда сезиларли натижаларга эришган АҚШ, Германия, Австрия, Корея Республикасининг илғор тажрибаси ҳисобга олинган”.