“Тожик темир йўли” ДУП ҳамда “Ўзбекистон темир йўллари” ОАЖ орасида ўтказилган музокаралар натижасида темир йўл орқали юк ташишда чегирмалар тизимини яратиш борасида келишувга эришилди.

Тожикистон транспорт вазирлиги матбуот хизматининг маълумотларига қараганда, 22 октябрь куни “Ўзбекистон темир йўллари” ОАЖ чегирмалар тақдим этилиши борасида телеграмма йўллаган. Бунда нефть маҳсулотлари, алюминий ва алюминий қириндисини Қудуқли-Келес, Қудуқли-Қорақалпоқ темир йўллари бўйлаб ташиш назарда тутилган.

Шунингдек, “Ховар” ахборот агентлигининг маълумотларига қараганда, Болдир-Қудуқли участкаси учун белгиланган 1.83 фоиз коэффициент ҳам бекор қилинган.
Ўз навбатида, “Тожик темир йўли” ДУП 20 октябрь куни Ўзбекистон юкларини Тожикистоннинг темир йўл зонаси орқали транзит қилишда чегирмалар тақдим этиш борасидаги телеграмма билан ўзбекистонлик ҳамкасбларига мурожаат қилган.
Таклиф қилинган чегирмалар икки қўшни давлат ўртасида юк айланмасининг ошишига хизмат қилиши айтилмоқда.