Қирғизистон божхонасида Тожикистондан мамлакатга ноқонуний йўл билан олиб кирилаётган қарийб бир тонна пахта тўхтатиб қолинди, деб хабар бермоқда Қирғизистон давлат божхона хизмати.

“Жануб” тезкор божхона ходимлари томонидан Боткен туманидаги “Қора-Боғ” қишлоғида Тожикистондан мамлакатга ноқонуний йўл билан оғирлиги 850 кг бўлган қайта ишланган пахта олиб кириш ҳолати аниқланди. Пахтанинг нархи 102 минг қирғиз сўмини ташкил қилади”, деб хабар бермоқда божхона матбуот хизмати.

Пахтанинг умумий қиймати 100 минг қирғиз сўмидан кўпроқни ташкил қилгани учун ушбу ҳолат юзасидан жиноий иш қўзғатиш мақсадида тезкор-тергов ишлари олиб борилмоқда.

Бундан ташқари, қирғиз божхоначилари 10 ноябрда Тожикистондан ноқонуний йўл билан 2,2 тонна узум ва бир тоннага яқин хурмо олиб кириш ҳолатининг олдини олишган эди.

Қайд этилишича, ушбу ҳолат юзасидан жиноий иш қўзғатилган.

Қирғизистон жорий йилнинг августидан Евроосиё иқтисодий иттифоқининг 5-аъзосига айланди. Бу Қирғизистон ва Қозоғистон ўртасида божхона назоратининг автоматик бекор қилиниши ва Қирғизистон ҳудудининг Евроосиё иқтисодий иттифоқи ягона божхона тарифига ўтишини англатади. Бироқ Тожикистон ҳозирча иттифоқ аъзоси ҳисобланмайди.