Ўзбекистон Республикаси Конституцияси қабул қилинганининг 23 йиллиги муносабати билан умумтаълим мактаблари, мактабгача таълим муассасалари, Меҳрибонлик уйлари ва махсус мактаб-интернатларда ҳуқуқий, маданий-маърифий тадбирлар ойлиги бошланди. Бу ҳақда Ўзбекистон Миллий ахборот агентлиги хабар берди.

Хабарда келтирилишича, давлатимиз раҳбарининг 2015 йил 9 ноябрдаги “Ўзбекистон Республикаси Конституцияси қабул қилинганининг йигирма уч йиллигини нишонлашга тайёргарлик кўриш ва уни ўтказиш чора-тадбирлари тўғрисида”ги фармойишига мувофиқ эълон қилинган мазкур ойлик доирасида барча таълим муассасаларида ўқувчи-ёшларга Бош қомусимизда белгиланган асосий тушунча ва тамойиллар кенг ўргатилмоқда.

“Ўқувчиларнинг ҳуқуқий онги ва маданиятини юксалтириш, билимларини янада бойитиш мақсадида ўтказилаётган ҳуқуқий, маданий-маърифий тадбирлар ойлиги доирасида етук мутахассислар, ҳуқуқшунослар жалб этилган ҳолда расмлар танлови, фото кўргазмалар, очиқ дарслар ва тарбиявий соатлар ўтказилмоқда, – дейди агентлик суҳбатдоши, Халқ таълими вазирлиги бошқарма бошлиғи Ҳикматулла Даминов. – Мавжуд 9698 умумтаълим мактабида таҳсил олаётган 4 миллиондан зиёд ўқувчига Конституция асосидаги ҳуқуқий билимларнинг ўқитилиши тегишли давлат таълим стандартлари асосида алоҳида-алоҳида босқичларга ажратилган ҳолда амалга оширилмоқда”.