Навоий вилоятининг Конимех туманида жойлашган “Сарибел” наслчилик-ширкат хўжалигида 173та туя боқилмоқда. “Оила даврасида” нашрининг ёзишича, хўжалик соҳиби Нортой Шалтиев туялар ортидан кўраётган даромади ҳисобига тўйлар ўтказмоқда.

“Оғанинг 173 туяси бор. Йигирма беш йилдирки, хўжаликнинг Янгиқазғон, Тоғаймурод деб номланган яйловларида туя боқади. Ўғиллари ҳам ота касбини танлаган. Қизлари ва келинлари эса туя соғиш, жунидан ип йигириб, гилам тўқиш ҳамда турли кийимлар тайёрлаш билан машғул. Туя жуни, терисининг пишиқлиги, фойдалилиги қадим-қадимдан маълум”, - дейилади материалда.

Нортой Шалтиевнинг туяларидан ҳар куни 200-250 л атрофида сут соғиб олинади. Шу тариқа, ўртача кунлик даромад 300-350 минг сўмни ташкил этмоқда. Ширкат келажакда туялар сонини кўпайтириш ниятида.