Қозоғистоннинг Риддер шаҳри суди 26 ёшли блогер Игорь Сичёвни айирмачиликка чақириқда айблов билан 5 йиллик қамоқ жазосига маҳкум қилди.  

Сичёв ўз айбини тан олмади ва суд ҳукми устидан шикоят қилмоқчи. Айблов томони судланувчига 5 йиллик қамоқ жазоси берилишини сўраб, мисол тариқасида Қримнинг Россия таркибига киришини келтириб ўтди. Прокурорнинг айтишича, Сичёв атайлаб “рус аҳоли кўп яшайдиган ҳудудда” айирмачилик кайфиятини уйғотмоқчи бўлган.

Сичёв “ВКонтакте” ижтимоий тармоғидаги “Риддерда тингланганми?” (“Подслушано в Риддере?”) гуруҳининг маъмурларидан бири бўлган. Жорий йилнинг баҳорида у гуруҳда “Риддерда овоз бериш ўтказилса, нима бўлишини фараз қилиб кўрайлик” номли пост жойлаштирди, унда фойдаланувчилар Россия таркибига кириш ёки кирмаслик учун овоз беришлари мумкин бўлди.  

“Мен бу овоз беришни яратмаганман ва эътирозлардан кейин у ўчириб ташланди. Менинг хатти-ҳаракатларимда ҳеч қандай айирмачилик фаолиятига ишора бўлмаган”, деб ёзди Сичёв Қозоғистон президенти ҳузуридаги инсон ҳуқуқлари бўйича комиссияга ёзган шикоятида.

2014 йил апрелда Қозоғистон бош прокуратураси айирмачилик фаолияти учун жазолашни кучайтиришини маълум қилганди.