2015 yilning 17-20 noyabr kunlari Budapesht shahrida 1992 yilda qabul qilingan Transchegaraviy suv oqimlarini va xalqaro ko‘llarni himoya qilish va ulardan foydalanish to‘g‘risidagi Konventsiya tomonlarining 7-yig‘ilishi bo‘lib o‘tdi. Unda O‘zbekiston Respublikasi delegatsiyasi ishtirok etdi. Bu haqda O‘zbekiston TIV matbuot xizmati xabar tarqatgan.
Yig‘ilish chog‘ida Konventsiya doirasida transchegaraviy hamkorlik istiqbollari, uning Barqaror taraqqiyot maqsadlariga erishishdagi ahamiyati, shuningdek, 2030 yilgacha mo‘ljallangan boshqa global tashabbuslarni amalga oshirish masalalari ko‘rib chiqildi.
Tadbirda 74 davlat hamda Yevropa Ittifoqi Komissiyasi, BMTning Yevropa iqtisodiy komissiyasi, Oziq-ovqat va qishloq xo‘jaligi tashkiloti, Taraqqiyot dasturi, Atrof-muhit bo‘yicha dasturi, Markaziy Osiyo uchun preventiv diplomatiya bo‘yicha mintaqaviy markazi, shuningdek, Iqtisodiy hamkorlik va taraqqiyot tashkiloti, Yevropada xavfsizlik va hamkorlik tashkiloti, Global suv hamkorligi, Davlatlararo muvofiqlashtiruvchi suv xo‘jaligi kommissiyasi Ilmiy tadqiqot markazi, Markaziy Osiyo Mintaqaviy ekologik markazi, suv havzasi tashkilotlari, nohukumat tashkilotlari hamda ilmiy doiralar vakillari ishtirok etishdi.
Tadbir chog‘ida Konventsiyani amalga oshirish qo‘mitasiga saylov o‘tkazildi. Muhim tizim hisoblangan mazkur Konventsiya kotibiyati qo‘mitasi a'zoligiga ilk bor O‘zbekiston vakili saylandi.
O‘zbekistonning ushbu qo‘mitadagi faoliyati Markaziy Osiyoda suv resurslaridan oqilona va adolatli foydalanish bo‘yicha O‘zbekistonning prinsipial qarashlarini inobatga olgan holda BMTning Yevropa iqtisodiy komissiyasi bilan xalqaro huquqiy mexanizmlar doirasida hamkorlikni yo‘lga qo‘yish imkonini beradi.
Bundan oldinroq, O‘zbekiston delegatsiyasi Budapeshtdagi xalqaro yig‘ilishda ishtirok etishi haqida xabar qilingandi.