2015 йилнинг 17-20 ноябрь кунлари Будапешт шаҳрида 1992 йилда қабул қилинган Трансчегаравий сув оқимларини ва халқаро кўлларни ҳимоя қилиш ва улардан фойдаланиш тўғрисидаги Конвенция томонларининг 7-йиғилиши бўлиб ўтди. Унда Ўзбекистон Республикаси делегацияси иштирок этди. Бу ҳақда Ўзбекистон ТИВ матбуот хизмати хабар тарқатган.

Йиғилиш чоғида Конвенция доирасида трансчегаравий ҳамкорлик истиқболлари, унинг Барқарор тараққиёт мақсадларига эришишдаги аҳамияти, шунингдек, 2030 йилгача мўлжалланган бошқа глобал ташаббусларни амалга ошириш масалалари кўриб чиқилди.
Тадбирда 74 давлат ҳамда Европа Иттифоқи Комиссияси, БМТнинг Европа иқтисодий комиссияси, Озиқ-овқат ва қишлоқ хўжалиги ташкилоти, Тараққиёт дастури, Атроф-муҳит бўйича дастури, Марказий Осиё учун превентив дипломатия бўйича минтақавий маркази, шунингдек, Иқтисодий ҳамкорлик ва тараққиёт ташкилоти, Европада хавфсизлик ва ҳамкорлик ташкилоти, Глобал сув ҳамкорлиги, Давлатлараро мувофиқлаштирувчи сув хўжалиги коммиссияси Илмий тадқиқот маркази, Марказий Осиё Минтақавий экологик маркази, сув ҳавзаси ташкилотлари, ноҳукумат ташкилотлари ҳамда илмий доиралар вакиллари иштирок этишди.

Тадбир чоғида Конвенцияни амалга ошириш қўмитасига сайлов ўтказилди. Муҳим тизим ҳисобланган мазкур Конвенция котибияти қўмитаси аъзолигига илк бор Ўзбекистон вакили сайланди.

Ўзбекистоннинг ушбу қўмитадаги фаолияти Марказий Осийода сув ресурсларидан оқилона ва адолатли фойдаланиш бўйича Ўзбекистоннинг принципиал қарашларини инобатга олган ҳолда БМТнинг Европа иқтисодий комиссияси билан халқаро ҳуқуқий механизмлар доирасида ҳамкорликни йўлга қўйиш имконини беради.

Бундан олдинроқ, Ўзбекистон делегацияси Будапештдаги халқаро йиғилишда иштирок этиши ҳақида хабар қилинганди.