2015 йил давомида Тошкент шаҳар ёнғин хавфсизлиги идорасига ёнғин ҳақида 14 марта ёлғон қўнғироқ бўлди. Бу ҳақда Тошкент шаҳар ИИБ Ёнғин хавфсизлиги бошқармаси бош мутахассиси Мурод Қўчқоров айтиб ўтди.

“Шу йил давомида 14та шундай ҳолатни рўйхатга олдик, - деди у “Даракчи” нашрига берган интервьюсида. – Бундай ҳолатлар маъмурий жавобгарлик билан ниҳоясига етади”.

Эслатиб ўтамиз, 20 ноябрдан Ўзбекистонда “Ёнғин хавфсизлиги ойлиги” старт олади. Шу муносабат билан Тошкент шаҳар ҳокимиятида ёнғин хавфсизлиги мутахассислари иштирокида матбуот анжумани ўтказилди. Унда маълумот берилишича, сўнгги 10 ойда республика бўйича 1 474 ёнғин юзага келган бўлиб, унда 17 киши ҳалок бўлган, яна 24 киши азият чеккан. 20 киши қутқариб қолиниб, 20 млрд сўмдан ортиқ моддий-товар бойликлари сақлаб қолинган.