2015 йилнинг 23 ноябрь куни Ташқи ишлар вазирлигида “Ўзбекистон Республикасининг халқаро шартномалари тўғрисида”ги қонунни амалга ошириш бўйича таҳлилий учрашув бўлиб ўтди. Учрашув ТИВ ваколати доирасида халқаро шартномалар ижросини назорат қилишга бағишланиб, унда қишлоқ хўжалиги соҳасида халқаро шартномаларни амалга ошириш жараёни кўриб чиқилди.

Учрашувда вазирликлар, идоралар ва мамлакатимизнинг илмий-тадқиқот муассасалари вакиллари иштирок этди.

Тадбир давомида юқорида кўрсатилган соҳада Ўзбекистон Республикаси шартномавий-ҳуқуқий негизининг бугунги ҳолати ва янада такоммиллаштириш истиқболлари таҳлил қилинди. Илғор халқаро тажрибани ва хорижий давлатлар билан ўзаро манфаатли ҳамкорлик шаклларини ўрганишга алоҳида урғу берилди.

Учрашув якунида тегишли халқаро шартномаларни амалга оширишда вазирлик ва идоралар фаолияти самарадорлигини янада ошириш юзасидан таклифлар тайёрланди.