Тошкентда бугун, 26 ноябрь куни, инсон ҳуқуқлари бўйича “Инсон ҳуқуқ ва манфаатларининг ишончли ҳимоясини таъминлаш – мамлакатни демократик янгилаш ва модернизация қилишнинг энг муҳим йўналиши: Ўзбекистон тажрибаси” мавзуидаги халқаро конференция иш бошлади, деб ёзмоқда "Газета.уз".

“Халқаро форумни ўтказишдан кўзланган мақсад нафақат жамоатчиликни ва хорижлик ҳамкорларимизни Ўзбекистонда инсон ҳуқуқлари бўйича аҳвол қандайлиги борасида ахборот бериш, балки чет эл экспертларининг бу борадаги тажрибасини ҳам олишдир”, - деди тадбирни очиб берган инсон ҳуқуқлари бўйича миллий марказ директори Акмал Саидов.

Тадбирда турли мамлакатлар элчилари, халқаро институтлар вакиллари, шунингдек, Ўзбекистон парламенти, давлат ҳокимияти ва бошқаруви органлари вакиллари, фуқаролик жамияти намояндалари иштирок этмоқда.
“Бу ўзгарувчан дунёда бағрикенглик ва инсон ҳуқуқларини ҳурмат қилиш асос принциплар ҳисобланади, - деди БМТнинг Ўзбекистондаги доимий вакили Стефан Приснер ўз чиқишида. – Инсон ҳуқуқлари ривожланган давлатнинг энг муҳим индикаторларидан биридир”.

Конференция икки кун давом этади. Унда инсон ҳуқуқлари, суд-ҳуқуқ тизимини демократизация ва либерализация қилиш сингари масалалар кўриб чиқилади.