Доминикан республикаси шарқида икки автобуснинг тўқнашиб кетиши оқибатида энг камида 11 киши ҳаётдан кўз юмди, 70дан зиёди жароҳатланди, дея хабар бермоқда Associated Press агентлиги мамлакат ҳукумати маълумотига асосланган ҳолда.

Автобуслар сайёҳлик курортлари ишчиларини олиб кетаётган бўлган. Тўқнашув ҳам сайёҳлик зоналари жойлашган икки шаҳар ўртасидаги йўл участкасида рўй берди.
Ҳукумат вакилининг сўзларига кўра, вафот этганлар сони янада ортиши мумкин, чунки жароҳат олганлар ичида аҳволи ўта оғирлар ҳам бор.

Ҳукумат ҳодиса сабабларини ўрганмоқда. Тахминий маълумотларга кўра, автобуслардан бирининг олд ғилдираги ёрилиб кетган ва шунинг учун транспорт воситаси қарама-қарши томонга ўтиб кетиб, бошқа автобус билан тўқнашиб кетган.