Ўзбекистонда ОИВ (одам иммуновируси) билан касалланган оналардан туғилган болаларнинг 99,8 фоизи соғлом дунёга келган. Бу ҳақда Республика ОИТСга қарши кураш маркази директори ўринбосари Дилдора Мустафоева Uzbekistan Today нашрига берган интервьюсида маълум қилди.

Мустафоеванинг айтишича Ўзбекистонда бир неча йиллар мобайнида ОИВ билан зарарланган оналардан соғлом болалар дунёга келувчи методика ишлаб чиқилган. “Бугун бизда ОИВ билан касалланган оналардан туғилган болаларнинг 99,8 фоизи соғлом дунёга келган. Ёшлардан бири ОИВ билан касаллигини била туриб турмуш қуриш муаммоси мавжуд.

Яқинда Жаҳон соғлиқни сақлаш ташкилоти бундай оилаларга оиланинг соғлом аъзоси ушбу касалликни юқтириб олишининг энг минимал хатари ва соғлом болалар туғилиши билан узоқ умр ва бахтли ҳаёт кечиришларига имкон берувчи методикалар ишлаб чиқилгани ҳақида маълумотни тақдим қилди. Яқин келажакда бу методикалар Ўзбекистонда татбиқ қилинади. Бундан ташқари, бугунги кунда барча ОИВ-касалланганларга антиретровирус терапия белгилаш варианти кўриб чиқилмоқда.

Бугунги кунда бундай даволашни белгилашга организмда СD–4 таначаларнинг 500 дан камлиги асос бўлади”, деб таъкидлаб ўтди Мустафоева. Аввалроқ бир неча йиллар мобайнида ушбу юқумли касаллик билан янги касалланганлар сони йилига 4 мингдан кўпроқни ташкил қилмаётгани ҳақида маълумот берилганди. Республика ОИТСга қарши кураш маркази маълумотларига кўра, 2014 йил 1 декабрь ҳолатига кўра, Ўзбекистонда 27,5 мингдан кўпроқ ОИВ билан касалланганлар қайд этилган.