Бразилия ҳукумати мамлакат жануби-шарқида тўғонлар бузилиши учун жавобгар компанияларга қарши 20 млрд реал ёки 5.2 млрд долларлик даъво тайёрламоқда. Бу ҳақда мамлакат атроф муҳитни ҳимоя қилиш вазири Изабелла Тейшейра баёнот берди.
Унинг сўзларига қараганда, олинган пуллар экологик талафотни бартараф қилиш ҳамда зарар кўрган маҳаллий аҳолига ёрдам кўрсатиш учун сарфланади.

“Компаниялар ўзининг режаларини амалга ошириш доирасидаги ҳаракатлари учун жавобгарликни ҳам зиммаларига олиши лозим. Бу режалар ҳуқуқ-тартибот органларига тақдим этилади. Узилган биологик занжирни тиклаб бўлмайди. Бизнинг вазифамиз салбий оқибатлар бартараф қилишдир”, - деди у.
Вайрон бўлган тўғонлар билан ишлаган Samarco компанияси 1 млрд реал (263 млн доллар) тўлашга рози бўлди.

5 ноябрь куни мамлакат жануби-шарқида металлургик ишлаб чиқариш қолдиқлари ташланган сувни ушлаб турувчи икки тўғон бузилди. Бунинг оқибатида 600 киши яшайдиган ҳудуд сув остида қолиб кетди. Охирги маълумотларга қараганда, 11 киши ҳалок бўлган, 12 киши дом-дараксиз кетган.