Сурхондарё вилоятининг Бойсун туманида жойлашган Мачай қишлоғида ёнар булоқ топилди. Бу ҳақдаги мақола “Народное слово” газетасида чоп этилди.
Муаллифнинг таъкидлашича, булоқнинг бундай хусусияти ҳақида 10 йил муқаддам маълум бўлган.

“Илгари бу булоқ ҳеч кимнинг диққатини тортмас эди, негаки тоғларда бу каби булоқлар кўп, - деб ҳикоя қилади маҳаллий аҳоли вакили, 80 ёшли Салоҳиддин Мажидов. – Ўн йил олдин қиш пайти Мачайга йўл олган бир сайёҳ йўл бўйида дам олишга қарор қилади. Булоқ олдига ўтириб, ўтин териб, олов ёқади.

Кейин қараса, олов сувга етиб боради, сув ҳам ёниб, атрофни исита бошлайди... Шундан буён бу жой Ёнарбулоқ номини олди. Унинг бу хусусиятини қишлоқнинг ҳар бир одами шахсан текшириб кўрди”.
Мақолада булоқнинг бундай хусусиятлари қандай ҳодиса билан боғлиқлиги тушунтирилмаган.