Самарқанд вилоят божхона бошқармаси ходимлари бошқа ҳуқуқ-тартибот идоралари вакиллари билан ҳамкорликда вилоят ҳудудида контрафакт алкоголь маҳсулотлари ишлаб чиқарувчи бир қанча ноқонуний муассаса фаолиятини фош этди.

Бошқарма матбуот хизматининг хабар беришича, Оқтош туманида ўтказилган рейд чоғида фуқаро В. Якубованинг уйидан илгари ишлатилган 943 дона металл ва пластмасса қопқоқлар, қопқоқлар учун 50 дона полиэтилен қопламалар, серия рақамлари бир хил бўлган 85 дона сохта акциз белгилари топилган.

Каттақўрғон шаҳрида яшовчи фуқаро С. Алимованинг уйида ўтказилган тинтув чоғида эса 190 шишага қуйилган жами 85 л контрафакт алкоголь маҳсулот аниқланди.
Самарқанд шаҳрида эса фуқаро М. Умаровнинг уйидан 22 шиша умумий ҳажми 17 л бўлган контрафакт виски топилди.
Барча ҳолатлар юзасидан иш очилди.