Ҳиндистон жанубидаги Таминаду штатидаги сув тошқинлари туфайли ҳалок бўлганлар сони 188 нафарни ташкил этмоқда. Бу ҳақда Firstpost нашри хабар тарқатган.

Бундан аввалги хабарда 176 кишининг ўлими қайд этилгани хабар қилинганди.

Ченнаи шаҳрида бу табиат ҳодисаси туфайли аэропорт ёпиб қўйилган. Шаҳардаги мактаб ва коллежлар 10 кундирки, фаолият кўрсатаётгани йўқ. Олий таълим муассасаларида имтиҳонлар бекор қилинган.

Ёғингарчиликлар миқдори сўнгги бир неча кун ичида камайганига қарамасдан, Ченнаи ва Куддалоранинг айрим ҳудудлари ҳамон сув остида қолмоқда.

Таминадудаги Тируваллур, Канчипур ва Пудучерри туманларида ҳам талофатлар жиддий. Штат бош вазири Жаяр Жаялалитҳа аҳолини хавфсиз ҳудудларга жойлаштириш бўйича кўрсатма берган.

Қайд этилишича, айни вақтда кузатилаётган ёмғирлар 100 йил ичидаги энг талофатлиси бўлди. Қутқарув ишларига армия ва мамлакат Ҳарбий ҳаво кучларига тегишли вертолётлар жалб қилинган.