Туркия полицияси 1 декабрь куни Истанбул шаҳридаги метронинг "Байрампошо" бекатида юз берган портлашга алоқадорлиги гумон қилинган шахснинг белгилари ҳақида маълумот тарқатди. Haberturk хабарига кўра айни вақтда уни қидириш ишлари олиб борилмоқда.

Хабар қилинишича, гувоҳлар портлаш содир бўлган вақтда 28 ёшлар атрофидаги, қора куртка ва оқ-қизил йўлли свитер кийган, бошида ҳаворанг шапкаси, оёғида қизил кедаси бор йигитнинг воқеа жойидан қочиб кетаётганида кўришган.

Бундан ташқари, портлашга қўлбола бомба ҳаракатга келтирилиши сабаб бўлган.

Эслатиб ўтамиз, кечаги куннинг иккинчи ярмида метронинг "Байрампошо" бекатига олиб ўтувчи ерости ўтиш йўлида портлаш содир бўлиши натижасида бир киши ҳалок бўлган.
Ҳукумат, хусусан Истанбул губернатори Васип Шаҳин бу ҳодисани теракт сифатида баҳолаган.

Портлаш содир бўлган вақтда йўлдан поезд ўтаётганди ва унинг ойналари тўкилиб тушган.

Ғарбдаги бир қатор нашрларда портлаш туфайли жароҳатланганлар сони 5 нафарни ташкил этиши ҳақида хабарлар тарқалган.