Хусийчи жангарилар назорати остидаги Яманнинг Сано шаҳрида мамлакатнинг юқори раҳбарияти, жумладан, президенти устидан давлат тўнтарилиши айби бўйича суд жараёни бошланди, дея хабар тарқатди Sputnik агентлиги суддаги ўз ахборот манбаси маълумотига таянган ҳолда.

Айни пайтдаги Яман ҳукумати ўз ишини жангарилар қўлидан озод қилинган мамлакат жанубидаги йирик Адан шаҳрида фаолият юритмоқда. Ушбу шаҳарга президент Ҳодий ҳам Саудия Арабистонидан қайтиб келган. Пойтахт Сано шаҳри эса ҳамон Яманнинг собиқ раҳбари Али Абдулла Солиҳ тарафдорлари ҳисобланган хусийчилар қўлида қолмоқда.

“Бош прокуратура давлат раҳбариятининг етти нафар аъзосига тегишли ҳужжатларни судга тақдим этди. Терроризм ва давлат хавфсизлиги масалаларига ихтисослашган жиноий суд бугун давлат тўнтарилиши ва мамлакатни вайрон қилишда “саудиялик душманлар”га кўмак кўрсатганлик айби билан жараёнлар бўйича биринчи мажлисини бошлади”, - деди ахборот манбаси.

Айблов Яман президенти Абд Роббу Мансур Ҳодий, унинг уч нафар маслаҳатчиси, содиқ Ташқи ишлар вазири Рияд Ясин, Яманнинг АҚШдаги элчиси ва мамлакат миллий хавфсизлик маҳкамаси раҳбарига нисбатан эълон қилинган.