1 декабрь куни Ташқи иқтисодий алоқалар, инвестициялар ва савдо вазирлигида Америка қўшма штатларининг Ўзбекистон Республикасидаги фавқулодда ва мухтор элчиси Памела Спартлен билан учрашув бўлиб ўтди.

Музокаралар чоғида икки ёқлама савдо-иқтисодий ва инвестициявий ҳамкорлик борасида муҳим масалалар муҳокама қилинди. Томонлар жорий йилнинг октябрь ойида Вашингтон шаҳрида 120дан ортиқ Ҳукумат инсититутлари, АҚШнинг етакчи компания ва банк-молия ташкилотлари раҳбарлари иштирокида бўлиб ўтган Америка-Ўзбекистон савдо палатаси йиғилишининг якунларига алоҳида тўхталиб ўтишди.

Шунингдек, 2015-2016 йилларда давлат мулкини хусусийлаштириш Дастурида кўзда тутилган, Ўзбекистонда хусусийлаштириш жараёни доирасида лойиҳаларни амалга оширишда айнан Америка компанияларини жалб қилиш масалалари ҳам алоҳида муҳокама қилинди.

Шу ўринда, Америка бизнесининг Ўзбекистон билан ҳамкорликни ривожлантиришга қизиқиши ортиб бораётгани таъкидланди. Бунга жорий йилнинг ноябрь ойида Халқаро Инвестиция форуми ишида АҚШнинг 13та компаниясининг иштирок этгани ва улар билан янги ҳамкорликдаги инвестициявий лойиҳаларни ҳамда акциядорлик жамиятларидаги давлат улушларини сотиб олиш бўйича 8та ҳужжат имзолангани мисол бўла олади.