Россия президенти матбуот котиби россиялик ҳарбийлар ИШИД билан курашаётган Сурия армияси ҳаракатларини бошқаришни амалга оширмайди, деб айтди. Бу ҳақда “Интерфакс” ахборот агентлиги маълум қилди.  

Журналистлардан бири Песковдан Владимир Путиннинг ИШИД билан курашдаги муваффақиятлар “ҳаводан ишлаётган ва Сурия армияси бўлинмаларини бошқараётган” россиялик ҳарбийлар туфайли юз бераётгани россиялик ҳарбийлар суриялик ҳамкасбларининг ҳаракатларини бошқараётганини англатадими, деб сўраганда Песков “Йўқ, мутлоқ англатмайди”, деб жавоб берди.

Песковнинг айтишича, “ҳужумкор ҳаракатларнинг ҳаводан туриб қўллаб-қувватланиши амалга оширилганда, жанговор шароитларда маълумотлар билан фаол алмашув боради”. Матбуот котиби “айнан шу нарса назарда тутилган” деб таъкидлаб ўтди.

Песков, шунингдек, “Сурия армияси сафларида росиялик ҳарбийлар борми?” деган саволга “йўқ” деб жавоб берди.

Аввалроқ Владимир Путин россиялик ҳарбийларни давлат мукофотлари билан тақдирлаш чоғида Суриянинг Су-24 самолёти уриб туширилган ҳудудида жангарилар томонда россияликлар жанг қилаётганини айтганди.